تجربة Golf GTI 2007 بعد 90000 كم

السلام عليكم :)

قبل اسبوع و شوي قطعت سيارتي 90000 كم ... وقلت بها المناسبة انزل تجربتي مع السياره و انطباعاتي عن السيارة و الوكيل ساماكو و وضع السيارة في الشارع :)


اولاً نبدا بنبذه عن السيارة ... الجيل الخامس من الجي تي اي ... 200 حصان 202 قدم للعزم (ان ما خانتني الذاكره) ... 4 سلندر تربو ... السياره كاسم في اوروبا ما عليها اي كلام .... الجي تي اي كان دايم رمز للمتعه في القيادة, الاعتماديه و السعر المعقول مقابل مواصفات ممتازه ...


وقت شرائي للسياره كنت طالب في امريكا 2007 .. القولف توووها متغير شكلها ... وما كانت ببالي ... خياراتي كانت نيسان زد 350 و مازدا ار اكس 8 ...

جربتهم كلهم ... وبحكم وكاله مازدا جدار بجدار مع وكاله الفولكس ... شفت القولف و قلت خلني اجربها ... بكل بساطه .. متعه ما بعدها متعه ...

التربو يكب العزم عليك في الار بي ام بعد 2000 و يستمر لين 4.5 وهو تحس بيطيرك ... خ و ر ا في ... مو بس القولف .. اسأل اي شخص موتره تربو و يكون شابك على النمر الصغيره من بدايه دوارن المكينه ..

انا بعد ما جربت السياره .. رجعت و سويت لي بحث طويل عريض على القولف .. وبعد اسبوعين اشتريت السياره ..


خلصت دراستي ببدايه 2008 ... وما فكرت ابيعها ... واشحنها معاي للسعودية ... جمرك يا ولد و افحص عند المواصفات والمقاييس ,, ركب اللوحات و توكل على الله ... ما كان عندي اي مشاكل ... وهنا بدى الفلم مع ساماكو ...


انا بصراحه كنت اسمع عن ساماكو شي يخوف .. و شايل من بالي ضمان المصنع .. و قلت على الله بس يدخلوه الصيانه الدوريه ... وفعلاً جت اول صيانه .. وصادفت سبحان الله ان المكيف كان فيه مشكله ما يبرد ...


رحت لورشه قبل الوكاله عشان اعرف بالظبط وش اللي صاير و اذا فيه امكانيه ابعد عن تصليح الوكاله ... للأسف قال والله ما ادري ,, شوف الوكاله و قلي وش القطع يمكن ادبرها لك ...

توجهت لساماكو ... قابلت موظف استقبال الصيانه .... قلت لك انا عندي صيانه دوريه .. ... الا اخوي وش وضع الضمان للفولكس الامريكي ؟
عادي نقبله
!!!!! ما صدقت بصراحه .. ورجعت سألته اكيد ؟ قال ايه بس تعطينا فاتورة شراء السيارة عشان نطبق تاريخ الضمان صحيح و نفتح للسيارة كرت عندنا ... !! وفعلا تركتها .. كان فيه مشكله في الكمبرسر (ولا مالها دخل بالحراره او الجو ,, القطعه بكل بساطه خربت و هي نفسها موجوده في القولف السعودي) .. الكمبرسر كان ب2100 اتصور و الكويلات ب800 مع التركيب .. وكله على الضمان ...

الصيانه اللي بعدها (اتصور كانت 30000) مريت على موظف ثاني رائع بكل ما تعنيه الكلمه اسمع عبدالله العنزي ... و حطيت السياره عنده ... وقلت له عن بعض الملاحظات ... صرصره في احد المراتب , الكب هولدر اللي ورى دعس عليه ولد خالتي صغير وانكسر ,,, لحيه الصدام حكيتها برصيف وصار فيها بروز شوي ...

طلع معي مهندس يسمع الصوت .. صار من صواميل المرتبه اللي ورى .. واتصلح ..
ركب لي كب هولدر كامل جديد ...
لحيه الصدام عدلوها .. كل هذا تحت الضمان (شغل اللحيه كان معروف منهم بكل امانه)

وكان عندي مشكله في الراديو ... ارقام القنوات كانت بالفردي ... مو بالزوجي .. وبرمجه بسيطه و عدلوها ...

مأخذي الوحيد على الوكاله انهم للحين ما وفرو لي دي في دي النافقيشن حق الخليج .. من 2008 ,,, غير كذا والله ما شفت منهم الا كل تميز .. لا بأسعار و لا خدمه و لا انتظار ... بس لو يحطون سياره بديله اكون ممنون :) مكانهم بعيد شوي في الرياض للي يعرفه ...

الجدول اللي تحت يبين كم كلمفتني السياره من ناحيه صيانه وقطع طوال فترة تواجدها معي ... لك شي باستثناء الكفرات ... وراح اتكلم عنها بعد شوي ... لكن اللي يقول قطع غيار الفولكس غاليه .. اتصور انه يسمع هالكلام و لا يدري عنه ... والصيانه كل 15000 .. مو 5000 ولا 10000


شي غريب شوي ... الفحمات الخلفية غيرتها مرتين مع ان المفروض ما تخلص بسرعه ... بعكس الأماميه اللي لحد الحين بعد 90000 كم ما خلصت ... اخر مره رحت للصيانه قلت ياخي فكها وشوف لا تقول لي ما طلع لي اللمبه !! فكها و قال يا اخي باقي فيها النص !!!!!! عموماً سعرها ما يفرق عن الخلفيه :) و البطاريه ب غيرتها قبل سنه بالظبط 700 ( ادري انلعب علي في الوكاله لو مدورها برى كان حصلت ارخص بس كان نهار رمضان ومالي خلق اسوي شي)

كمواصفات .. سيارتي انا ممتأكد انها الوحيدة في الرياض ... جنط 18, جلد , نافيقشن و كوبيه .. فيه واحد ثاني معه كوبيه بس جنط صغير و مخمل .. ششفته كذا مره ... و هالشي يبيجبني لموضوع الاختلافات في المواصفات ... في الغالب مافيه فرق كثير ... لكن اللي لاحظته التالي ..

1- بدال التخشيب عندي كروم مطفي ..
2- نافقيشن ..
3- طفايه سجاير ما عندي
4- العدادات الكيلو بالصغير و الميل بالكبير ...

الباقي اتصور نفسه ... تدفئة مقاعد , فتحه , مدخل aux ,, ساوند سستم 12 سماعه , مكيفين , زينون عالي واطي, ساتلايت راديو (امريكا بس وكان خورافي :( )


نجي الحيين للصور .. واعتذر عن جودة الصور لكن الجود من الموجود .. بسم الله
















يتبع ...