سبق اني ذكرت مشكلة في التكييف.............عفواً مشاكل في التكييف في اغلب مواضيعي
والمرة هذه ادق في الوصف ..... والسيارة آفيو
اولا كان دايما عندي صوت طقة في الكمبريسور عند الدعس زيادة على البنزين ومعاها في نفس اللحظة نتفة قوية في السيارة. وحسب كلام الوكالة ضعف في العزم يأثر على الكمبريسور. وعملت الى الآن ثلاث مرات تصفية للسيارة خلال اول 60.000 كيلو ونفس المشكلة. وللعلم ولا عمري اشتكيت من ضعف برودة ......بل ممكن زيادة برودة كأني لحمة في فريزر
والآن الي لاحظته انه انبوب الفريون يثلج عند الدعس على البنزين ويزيد مع الدعسة والسيارة ماشية
الى أن اسمع صوت طق من الكمبريسور ومعاه نتفة قوية في السيارة والطقة هذه مستمرة كل ما دعست زيادة على البنزين ,والثلج كثيف جدا والله لدرجة ان السيارة من اسفل انبوب الفريون احصل بحر ماء على السيور واسفل السيارة . وكل ما وقفت مكان اشتري شي وارجع احصل تحت السيارة كأنه تحتي سيل ::: (طبعا سيل كلمة تشبيه ولا تطابق الحقيقة عشان ما تقولوا زودها بالخرش).
والصناعية كل واحد يفتي بشي .......
المصري: ده العربية عايزة توليف ثرموستات خارجية. وبعد كده كله تمام
اليمني 1 : لازم توليف ثرموستات عشان حقها ما يجي ثرموستات من بلدها !!
اليمني 2 : اول ما فكيت الكبوت وقلت له على الثلج والطقة راح قال ::الله يوفقك الله يوفقك اتوكل على الله, الله يوفقك الله يوفقك... والله ما فهمت ولا شي ولا سألته شي ومشيت !!! :smilie16:
اردني+مصري: يقولوا غير البلف الي يركب في الكمبريسور لانه هو الي يخليه يفصل.
البنغالي رقم 65 بعد المئة: اول ما اكلمه اتعب حلقي واوصف المشكلة والوصف الممل وبعد ما اخلص يقول لي ................ايش مشكلة مكيف؟؟؟
وغيره اغلبهم: مافي معلوم صديق.............:confused1:
وبصراحة تعبت من كثرة مواضيعي عن المكيف احس الي قرأ مواضيعي كلها بيقول ايش يبغى هذا ..شايل فريزر معاه ولا كيف...... وسامحوني على الاطالة..
