ابغا ابيع التاهو و استبدله بـ اكسبدشن ما رأيكم

اقول اذكر الله وخليك على التاهو اذا ما كان متعبك بالمشاكل وصدقني ما راح تلاحظ فرق كبير بين السيارتين ولا اقول كلامي هذا لوجود عيب في الاكسبدشين لكن لاني ما اشوف فيه عيب بالتاهو وخصوصا وانه له اكثر من ثلاث سنوات معك
اما اذا كنت من النوع الي ما يصبر على السياره وكل فتره مغير فهذا كلام ثاني
ولكن احذر من الي يلف ويدور علشان تسويق سيارات معينه بصريح العباره احذر من المناديب

ممكن اعرف السعر الي تريد تبيع بيه التاهو بعد اذنك .. تقبل مروري ... احترامي

الاكسبدشن ممتاز جدا
كان معي موديل 2006 ممتاز جدا لا خرابات ولا شيء
صرفية البنزين تقريبا مثل التاهو
مريح
راسي في الخطوط
العزل فيه رائع
لكن انصحك تصبر سنة بس
احتمال كبير يتغير شكله وبيركبون عليه مكينة صرفيتها البنزين اقل

-

انا شخصيا ركبت بالتاهو والاكسبدشن , " ماسقتها "
لكن كـ راكب , التاهو كان افضل بمراحل بالنسبه لي
خصوصا انه حتى الداخليه تفتح النفس اما داخلية الاكسبدشن
كئيبة

طبعا منب متعصب للتاهو او غيره هذا رايي رغم حبي الشديد
لفورد

انا اتفق معك في عيوب الجمس لاكن
انا انصحك تجربها تجربها تجربها
لاتاخذ كلام الناس وتجاربهم لأن البشر تختلف
انت تشوف الشيء عيب وغيرك يشوفه ميزه

لو تأجرها اسبوع على الاقل عشان يبان معاك كل شيء
وتجرب تمسك خط فيها وتجربها في البر وكل استخداماتك
ما تصير من حفره لدحديره

واذا ارتحت لها نفسيا فتوكل على الله واستخير
لأن السيارات بكل اشكالها وانواعها
توفيييييييييييييييييييق
والله يوفقك بالي في الخير ان شاءالله

سيكويا الحين مشترين بـ 180 ألف

والله زبالة بمعنى الكلمة

الجمس احسن منه بكثير,

بس انا ارشح الاكسبديشن

حبيبي السيارات توافيق من الله وكل نوع معين لايخلو من المشاكل حتى المرسيدس والبي ام .

المهم بالنسبة للأكسبديشن ترا امكن سيارته تكون عيب مصنعي وانا ما اكذبك لكن ماعتقد ( كل ) الاكسبدشنات الي هذا الموديل بيصير فيها نفس الي صار والدليل لما ودينا سيارتنا صيانه 88 الف اعرف واحد بالصيانه قلتلو كيف الاكسبديشن من ناحية الخرابات والاعطال يقول ماشاء الله من افضل السيارات وقليل يشتكو منه وماقيد جاتهم مشاكل كبيرة إالا واحد جاهم كان معاه 2007ويقول الدفرنس ضارب مع انه جديد وطبعا شي نادر .

وبالنسبة للتويوتا روح بنفسك قسم الصيانه وتشوف الهوايل اخي العزيز وطبعا مارح اطول السالفه .
بس حبيت اوضحلك .

تحياتي يالغالي.

السلام عليكم
اخي العزيز السيارة بصراحة توفيق من الله ...بتشوف ناس عندهم اكسبدشن ولا احلى لكن تشتريها انت فبتلش بمشاكل كثير ..والعكس صحيح .....

من ناحية تجربة ...انا مجرب فورد اكسبدشن 2008 ....بصراحة سيارة لا يعلى عليها ما شاء الله تبارك الله ....(طبعا السيارة للوالد) سافرت عليه من الدمام الى الرياض ...ومن الدمام الى جدة .... وبصراحة مريح ...والعزل الصوتي اكثر من رائع ...والسيارة ما شاء الله تبارك الله ...ما تقول ...شي ....طبعا الاستخدام ...هلكوها اخواني الصغار تفحيط وهسترت شباب ...لكن ما صادفنا فيها خرابات ...

طبعا السيارة راحت تشليح الله يستر عليها ...صار عليها حادث قوي ...والحمد لله على كل حال ...
ونفكر نشتري اكسبدشن 2011 .....وراح اخبرك بالجديد ....
لكن لا تستعجل ...واستخير ...وادرس الموضوع زين ....وخذلك دراسة 3 اشهر وبعد الاستخارة ...بيكون نزل سعر السيارة او انك درست الموضوع بما فيه الكفاية ...والله يرزقك الافضل ....

هلا وغلا اخوي بالنسبة للاكسبدشن 2007 و2008 اثنين من اخواني معهم ماشافو منه خرابات اواعطال عملي بمعنى الكلمة حتى اني اقنعت عديلي بشراء 2009 وكان يبي تاهو وغيرت رايه الى الاكسبدشن 2009 ومع الاسف تفشلت معه لانه يوم مشى 20الف طفى عليه وشاله بسطحة للوكالة وطلع خراب بطرمبة البنزين وغيروهاعلى الضمان والان مشى 66الف وبدا الموتر يترتر وولعت لمبة المكينة والان عند الوكالة وطلع خراب ببساتم المكينة بيكلف 10الاف ريال وتهاوش معهم علشان يصلحونه على الضمان وسولفت انا وصديقي اللي بصيانة السيارات عنداحد الوزارات عن سيارة عديلي وقال المعلومة اللي ذكرتها فماادري كيف يكون كلامي خاطئ وبالنسبة لتويوتا اخالفك الراي وانت هنا تكون الخاطئ جربنا التويوتا بانواعها معمرها نكدت علينا بالاعطال ويدلك على السلع اثمانها ومع ذلك الناس تشتريها على ارتفاع اسعارها وتحياتي

اشكرك عزيزي ابو ديالا على هذه الاضافة القيمة جدا

الاسباب التي ذكرتها مؤثرة و هي في الحسبان

و لكن تقدر تقول مليت من التاهو و من عدم راحة ركوبه و ازعاجه على الخطوط بالاضافة الى ان ممشاه زاد و حاب اغيره بدري بسيارة نفس الفئة و المواصفات بس اريح و عزل افضل مع العمل طبعا بنصيحتك رقم 3

شكرا لك مرة اخرى اخي ابو ديالا على هذه المشاركة و الله يعطيك العافية

بسم الله ماشاء الله تبارك الله

الله يعطيك خيرها و يكفيك شرها و يبارك لك فيها

شكرا لك على تفصيل النقاط المهمة في الاكسبدشن

و الله يعطيك العافية






اهلا بك اخي ملك الرمل

في الحقيقة انا بحثت عن اكسبدشن في الوكالة للقيادة التجريبية و لم تكن السيارة متواجدة حينها و سأنتظر الى ما بعد التجربة للقرار النهائي

شكرا لك





تقييم مهم جدا اخي الفجر و شيء رائع معرفة ان الاكسبدشن اكثر راحة

شكرا لعرض تجربتك و الله يعطيك العافية






شكرا لك اخي على النصيحة

الله يعطيك العافية

اسمحلي اخي العزيز كلام خاطئ مع احترامي ..

اولا من ناحية الاكسبديشن انه من فوق 2008 خرابات و و ترا كله كلام بس ناس كثير معاهم موديلات 2009 وفوق ماشين مسافات طويله وكرف الويل وماشاء الله لاكويلات ولا هم يحزنون .

وبالنسه للتويوتا عامه جودتها تعبانه ترى الناس صحيت خلاص الفورد افضل منها بمليون مرا وانت اركب السيارتين واحكم واذا وفي الافضل منهم كلهم الباترول صراحه روعه ع العموم تويوتا الان:xyxwave:

تحياتي.

من وكيلك ؟؟ العيسى ولا الجميح ولا بالبيد ولا العالميه ؟
اذا شفت عليه شي ارسل للمقر الرئيسي في دبي
ووش المشكله اللي واجهتها مع الوكيل ممكن تكون موجوده عند كل الوكلاء
يعني المشاكل اللي ماتخليك تصبر هي مثل عدم توفر القطع كذب في خراب السياره عشان مايدخلها الضمان وزي كذا
حاول تعرف مشاكلك مع السياره بالضبط قبل ماتفكر تغير خصوصا ان التاهو ماشاء الله ممتاز جدا

الله يعطيك العافية على المعلومات القيمة اخي bngo

انا مستبعد فكرة الدورانجو لأن اهم مسألة كرهتني في التاهو هو الوكيل .. مو معقول اطيح في نفس المشكلة مرة ثانية :wink:

سألقي نظرة على السيارة لكن لا تزال الفكرة بعيدة جدا






بسم الله ماشاء الله

الله يعطيك خيره و يكفيك شره و يجعلها سيارة مباركة

معلومات مهمة زودتني بها اخي اللافي

سأعود لك لاحقا لبعض التساؤلات ان وجدت






الله يعطيك العافية اخي سواليفي .. اشكرك على الافادة و المعلومات القيمة

اذن نحط خط تحت بعض قطع الغيار في الاكسبدشن مثل طرمبة بنزين - كويلات - دينمو

و كما تعلم ان اكثر سيارات مكروفة في الدنيا هي السيارات الحكومية و سيارات الايجار و شهادة صديقك حتفيدني كثير في اتخاذ القرار المناسب

اما السيكويا مستبعد لسببين .. يتجاوز الميزانية المحددة ... و يتجاوز الحجم المحدد

شكرا لك






انا في انتظارك اخي انس و يسعدني معرفة الجديد عن الدورانجو

شكرا لتجاوبك و الله يعطيك العافية

أبعطيك شوري وأنت الرأي لك
أنا ما أنصحك تغيرها للأسباب أدناه :

1/ السيارة اللي تملكها الشكل الجديد ولم يتغير لحد الآن
2/ التاهو إحتمال يتغير 2013 يعني بعد أقل من سنتين .
3/ الإكسبيدشن إحتمال يتغير السنة القادمه .
4/ سيارتك الحالية حسب كلامك مرتاح معها .
5/ ما فيه فرق أو ميزة جذرية بين سيارتك ووالإكسبيدشن عشان تقوم بتغييرها.
6/ سيارتك يغلب عليها الطابع العائلي واللي معتاد عنها قلة التغيير .

-----

وأنصحك بأحد النصايح التالية :
1/ تنتظر الموديلات الجديده لأنه ممكن يكون فيها تغييرات تستحق إنك تقتني السيارة
2/ إذا كنت مال من سيارتك فلامانع تحط لها بعض الإضافات البسيطة اللي تجدد سيارتك بنظرك طبعاً تختلف حسب ميولك , لكن كشاشات وتلبيسه وجنوط وإسطبات وهلم جر .
3/ تشتري لك سيارة سيدان من الموديلات الحديثة وتكون لإستخدامك اليومي وتخلي التاهو للمهمات الشاقة .

---

عموماً هذي وجهات نظري والرأي لك أولاً وأخيراً

نصيحة

إبعد عن الديرانجو وغني له

بحكم تجربتي للسيارتين لمرات قليلة
خرجت بقناعة أن الاكسبيدشن أكثر راحة
لكن التاهو أجمل من الداخل والخارج
والجودة منخفضة في السيارتين يعني لا تقارن بجودة التويوتا أبدًا
لكن إن كنت في مدينة بها فرع توكيلات الجزيرة
ومواظب عالصيانة فأنصحك بالفورد فورًا

كل وحدة فيهم تتميز بشيئ عن الأخرى .. هذا هو عالم السيارات ..

الرأي هو .. جرب بنفسك وأحكم ولا تبحث ألا عن حاجتك الخاصة

وننتظر تجربة خاصة لك للسيارتين لكي تفيد بها أخوانك .. تحياتي .

اخي انا عندي اكسبيديشن ستاندر 2011

صراحه السياره ممتازه وما شفت منها الا كل خير

الراحه : معروفه سيارات فورد براحتها والسياره مريحه ما شاء الله
العزل: ممتاز
البنزين: الفل ب 50 بنزين 95 وما يشفط كثير


الي اقوله السيارة ما شفت منها الا كل خير وهي لها عندي 3 شهور