لمن لديه الخبره بالاكسبلورر

الديمقراطيه @user_261747 · 23-05-2011

السلام عليكم ورحمة الله وبركاته
اخواني الاعزاء
يوجد لدي فورد اكسبلورر موديل 2006 ,, قدر الله وكنت ماشي بسرعه 80كلم تقريبا وضربت الرصيف مع الجنب الايسر.
وكانت الضربه جامده كسرت الجنوط وغيرت المقصات فوق وتحت
وبعد تركيب الجنوط والمقصات جديده السياره وضعها تمام ولكن اذا كنت ماشي بطريق مافيه مطبات السياره طبيعيه واذا اخذت المطب واختل توازن السياره يطلع عندي صوت بالكفر الايسر الامامي واحس انو الدريكسون يتغير عن وضعه الطبيعي مع ملاحظة عندما يطلع الصوت اذا شلت عن دعسة البنزين يروح الصوت واذا دعست يرجع الصوت .
يعني الصوت مايطلع الا باختلال توازن السياره ,, الميكانيكيه حيروني واحد يقول عكس والثاني يقول غسلها بديزل مافيها شي والثالث يقول دفرنس ..
والله احترت اتمنى من لديه الخبره او مرت عليه مثل هالحاله مساعدتي وغفر الله لنا ولكم والمسلمين اجمعين ..

مركز جوانا @user_231566 · 24-05-2011

حيااك الله عزيزي وجزاكم والجميع الخير
موقعنا بحي الروضه ونشتغل سيارات فورد ولدينا ولله الحمد الخبره فيها
اذا اردت التواصل واكثر تحديد للموقع كلمني ارقامي موجوده ع التوقيع
بالتوووووووووووفيق

الديمقراطيه @user_261747 صاحب الموضوع · 24-05-2011

اخي مركز جوانا شكرا على ردك وجزاك الله خير .
مافي لمبات مولعه بالطبلون , وفي واحد قالي رمان وبعدين غير كلامه قال لو رمان الصوت مايروح اذا شلت رجلي اعزكم الله عن البنزين , ومركز جوانا وين موقعه؟ تستقبلون اكسبلورر ولكم خبره فيها لان احتمال بشحنها للرياض ..
اخي عبدالعزيز لك الشكر وجزاك الله خير .
اذا كان فلنجه ليش الصوت مايطلع الا باختلال توازن السياره ؟؟؟

عبدالعزيز 8 @user_231972 · 23-05-2011

الفلنجة والله اعلم تحتاج تغيير
ارفع الكفر وفر الكفر بيدك راح تحس وتسمع صوت رمان الفلنجة كأنه حديد يأكل بعضه متأكل يحتاج تغيير

بالتوفيق

مركز جوانا @user_231566 · 23-05-2011

اتوقع والله اعلم من الرمانات الاماميه
هل ولعت عندك لمبات في الطبلون؟؟

الديمقراطيه @user_261747 صاحب الموضوع · 23-05-2011

بارك الله فيك وجزاك الله خيرا ورحم الله والديك ورزقك من حيث لاتحتسب ..
ماقصرت اخووي والمقصات اصلي اليوم بنداوم بعد بالصناعيه وربك يفرجها
لك ودي ..

M~أمير بكلمتي~M @user_58367 · 23-05-2011

اذا الصوت فقط من الجهه اليسرى باذن الله ماهو من الدفرنش وتأكد من مسألة الصاجه تبع الفرامل لا تكون تحك في الهوب

وايضاَ البيرنق تبع الكفر والدبل حاول انك تشغله وتطفيه لأن ممكن بعد الاصلاح صار فيه مشكلة ومايرجع لوضعه الطبيعي

وصوت الي مع المطب تأكد من كذا ورشة قد تكون فيه مشكلة في نفس المقص غير اصلي

او فيه فضاوه

أخوكـ

الديمقراطيه @user_261747 صاحب الموضوع · 23-05-2011

ياحبيبي يامير يعطيك العافيه اولا ..
الصوت مثل الحديد يوم يحك في بعضه واحيانا تطلع ونه واحيانا لا .
مكان الصوت في الكفر الامامي الايسر . وسبق وقلت انو الدريكسون يتغير عن وضعه الطبيعي ..
واذا افترضنا انه دفرنش ليش الصوت مايطلع الا مع اختلال توازن السياره؟؟ لو الدفرنش فيه مشكله اعتقد بيطلع الصوت على طول او لا ؟؟
انا شكيت انو العكس بس الميكانيكيه يخلف الله وخاصه بمنطقتي الي متواجد فيها .
واذا فرضنا المشكله بالدبل وش علاقة الدبل باختلال توازن السياره ؟ هل له علاقه؟؟
اتمنى تتحملني واللي عنده خبره لايقصر
شاكر للجميع ...

M~أمير بكلمتي~M @user_58367 · 23-05-2011

وعليكم السلام ورحمة الله وبركاته

اول شئ بارك الله فيك لازم تحدد الصوت هو ونه او طق طقه وايضاً مصدره

لأن اذا كان ونه ويظهر الصوت مع الدعس ويختلف مع رفع الدعسه معناته فيه مشكلة اما في الدفرنش او العكوس

اما اذا صوت اخر فيجب تتأكد من سلامة االاذرعة البيرنقات الامامية وايضاَ اذا كان فيها دبل يجب فحصه

أخوكـ