يااخواني هذه أول مشاركة لي معكم أتمنى لاتخيبوا ظني
عندي ماركيز 2001 نظيف ووردة بمعنى الكلمة والحمدلله لكن وللأسف كرهت السيارة من كل قلبي بسبب مشكلة يسيرة يمكن أجد حلها عندكم
أحيانا السيارة ماتشتغل -تدق سلف بس ماتشتغل - والسيارة عليها ضمان 3سنوات شامل ووديتها المركز وقعدت عندهم يومين قالوا مافيها شئ وبعدين تكررت المشكلة وأحيانا وهي باردة ماتشتغل وأحيانا وهي حارة بمعنى ماتعرف لها وأحيانا 3أسابيع زي الفل وفجأة في موقف لاتحسد عليها ترفض تشتغل رحت لمركز غير مركز الضمان قلت يمكن المركز الأول نصاب وقالوا لي الطرمبة البنزين ضعيفة ماتدفع تحتاج تغيير وتنظيف بخاخات وتصفية ماكينة قلت غيروها كله أصلي 100% وبعدها بيومين وترجع المشكلة ووالله كرهتها كره العمى والمشكلة لو شغلتها 0نص تكة. ورفعت يدك عن المفتاح وطفت انس تشتغل السيارى الا بعد 10 دقائق من دق السلف المتواصل مع دعس البنزين - ليش أدعس ما أدري - تكفووووووووووووووووووووون ياناس أخدموني ولكم مني الدعوة الطيبة ؟؟
الله يحيك وأنا أخوك في ذا المنتدى المبارك ,,
عموما أنا فهمت من قصدك إن السيارة تتأخر ما تشتغل ,,,
نصيحتي لك إفحص المكينة بالكمبيوتر وراح تطلع معك المشكلة إن شاء الله ,,
وأا بأقولك تجربتي مع تأخر تشغيل السيارة ,,,وإن شاء لله تعالى تفيدك
عندي ثلاجة المكينة إنفجرت في حدى الأيام الغابرة , الثلاجة هذه ما دريت عنها إلا بعد فترة طويلة من يوم قامت تهرب زيت و موية ,,,رحت بالصدفة للوشة على إني بأغير سير المكينة , قال لي العامل الثلاجة عندك خربانة , روح جيب لي ثلاجة وبواجي ,رحت جبتها له وصلح السيارة , لكن للأسف
مجرد ما جيت أشغل السيارة أبطت معي مو مثل عادتها ,
جحححححححن جحححححن , صارت تتأخر جدا ما تشتغل , حتى جيرانا صاروا يقومون من النوم لا جيت أشغلها
مشيت عليها وتوكلت على الله ,فترة من الزمن
بعد فتره رحت أفحص كمبيوتر , ولا طلعوا فيها شي ,,,لا كويلات ولا كهرب , السيارة ميه ميه , على قولة الفلبيني
رحت لراعي ورشة , قال لي عندك ثلاث كويلات شغاله زين فقط , وخمسه ضعيفه ,,,لأن الثلاجة هربت زيت عليها وأعدمتها لكـ ,,,,,
والبواجي اللي أنت شاريها (شبه خربانه) لأنها مخزنة فتره طويييله , رحت شريت طقم كويلات من الوكاله وطقم بواجي من شركة التقوى , ولله الحمد السيارة صارت ما تتأخر في التشغيل ,,,تشتغل على طووول
جحن ,<< دايركت تشغل
بعد فتره صارت السيارة تطلع دخان أسود خفيف إذا جيت أشغلها الصبح , ولمبة المكينة ولعت ,والسيارة رجعت لحالتها القديمة , تتأخر تشتغل
رحت فريت ورش الرياض من أولها إلى آخرها لكن بدون فايده , كل واحد يفتي من عنده ,
أخذت بنصيحة واحد الله يجزاه خير , قال لي : غير الدبات اللي في سيارتك من دبات الرصاص (لأنه وارد أمريكي ,) إلى دبات خليجي , وإذا ما عندك نية تركب دبات جديدة , سو لها تنظيف بـ 60 ريال , ونظف البواجي , وأهم شي سو تنظيف للدبتين الخلفيه بس , اللي قدام لا تنظفها لأنه راح يفتحها باللحام وإذا سكرها راح تطلع صوت , فلا تقربها , أخذت بنصيحته وفكيت البواجي بالبيت ونظفتها بنفسي ,ورحت لحق الشكمانات ونظف الدبات , والله العظيم إن لمبة المكينة طفت على طوووول , والمكينة أحس إنها صارت مرتاحه وتشتغل على طوووووووووول , وصارت دعسسسه ,,,,,,,
والسبب إن الدبات تكون مليانه تراب و أوساخ ,وتصير كاتمة على المكينة شوي , وأحيانا ترتفع الحرارة , خصوصا إذا كانت شاد عزمها شوي ,
,أو يمكن إن سيارتك مثلي , مكتوب إنه يصلح لها بنزين أوكتان 86 وما فوق , وهو ما يصلح لها إلا 95 ويالله يالله يمشي حاله
, يعني جرب تعبي بنزين أحمر , يمكن تنحل مشكلتك
أتمنى إني أكون أفدكـ ,,,
وعطنا خبر باللي صار معك حتى تعم الفائدة
