السلام عليكم ورحمة الله وبركاته
كيف حالكم شباب
عندي مشكلة ما أدري وش سببها إلى الآن ما لقيت لها حل علما أن سيارتي أوبل أوميجا 3.2 6 سلندر موديل 2003
المشكلة باختصار وعساي أعرف أوصلها صح
اذا بغيت أشغل السيارة أدق السلف أكثر من مرة يعني يمكن أربع أو خمس مرات هذا اذا قمت الصباح وما تشتغل السيارة إلا بعد خمس مرات وبعد دعس البنزين وأيضا السيارة فيها تفتفة اذا وقفت عند الاشارة ورجلي على الفرامل واذا جيت أدعس تصير الدعسة مكتومة مرة يعني دعستها مهيب مثل أول ولمبة المكينة مولعة عندي على طول ...وصوت شكمان السيارة مهو طبيعي فيه صوت غريب
وأيضا اذا باقي في التانكي حق البنزين مسافة 100 كيلو ممشى تعطيني الدعسة هوا يعني ما تمسك ثم ترجع تمسك إلين يوصل العداد 100 كيلو ترجع الدعسة طبيعية ...!
وبصراحة ما خليت شي إلا وجربته فيها عند واحد سويت كل شي وآخر اقتراح جاني منه يبي يجرب لي كمبيوتر سيارة ثانية يشوف اذا المشكلة من الكمبيوتر وبصراحة أنا خايف على السيارة لأنها نظيفة ولله الحمد مرة ومعجبتني جدا جدا وإحساسي يقول لي انها مشكلة بسيطة مرة بس من يوصلني لحلها وأدعو له دعوة صادقة في ظهر الغيب ..
تكفون تراي بوجيهكم يالنشامى وإن شاء الله انكم أبوها وبتسمونها ..!
أخوكم
