شباب اليوم جايب لكم طريقة تصفير عداد خدمة الزيت اللي بالطبلون ، اللي يحدد لك متى تغير الزيت.
البعض يعرفها ، والبعض مايعرفها..
هذي العملية مخصوصة لموديلات الفئة الثالثة e36 من 91-98 فقط.
*** ملاحظة مهمة : لست مسؤولا عن اي خطأ يحصل لعدم اتباعك للتعليمات بشكل صحيح.
الطريقة جدا سهلة وسريعة ،، لكن تحتاج شوية حذر..
الفكرة اللي انا اتبعها في سيارتي هي .. خلي مفتاح التشغيل على وضع الكهرباء 2 ( يعني كل كهرباء تكون شغالة وكل لمبات الطبلون بما فيهم عداد الزيت ، الانوار ، الستيريو... الخ. من غير ماتشغل السيارة ) عارفين ايش اقصد طبعاً.
بعدين تجيب لك سلك ،، اي سلك ( واير ) ، بس اذا عندك شي مرتب زي اللي بالصورة او واير tester مال كهرباء ، يكون احسن. أنا استخدم واير عادي مقشوط من الجهتين ،، او tester.
بعدين تجي للفيش اللي يفحصون من السيارة كمبيوتر ، وتفتحه ،،
بتحصل فيه عدة مداخل مرقمة ،، ابحث عن المدخل رقم 7 ..
( انتبه لا تروح لمدخل برقم غير .. ترى احتمال كبير تخرب الكمبيوتر ..
سيارات يجي في 15 مدخل فقط ،، وفيه بعضها يجي فيها 20 ، انا سيارتي فيها 20 مدخل مرقمة بطريقة تسلسلية
بعد ماتشوف رقم 7 ( Pin 7 ) ، توصل السلك من المدخل رقم 7 إلى اي وصلة قراند في السيارة لمدة 3 ثواني بالضبط ثم تفصله عن القراند فوراً وتشيل السلك ، استخدم تايمر timer ،، اعتقد موجود في ; الجوالات ، او بعض الساعات الالكترونية.
بعد كذا تكون انت صفرت العداد كامل وصاروا الحبات كلها باللون الاخضر. طبعاً هالعملية ماتاخذ دقيقتين ، بعد كل تغييرة زيت ،، تسويها. ولا تدفع كل مرة 50 ريال للورشة عشان تسويها لك.
قد يقول البعض ايش استفيد انا من هالعملية ؟!!
أنا اقول لك : تدري ان سيارات البي ماتحرق زيت ابدا. وانها تقدر تمشي على الزيت لآلاف الكيلو مترات ، 3 اضعاف السيارات الثانية ،، انا امشي على سيارة مايقارب 15000 الف كيلو ،، ومابدل الا كل ست شهور ، مع العلم اني اسرع بالسيارة ،، ومشاويري كل يوم تقارب 100 كيلو او اكثر.
هذا العداد اللي في السيارة يريحك من الحساب ، كم مشيت انا ،، مادري متى ابدل ،، انت ريح بالك وخله هو يحسب لك.
انا اركب زيت كاسترول ، او زيت موبيل .
آخر مررة مشيت على الزيت مايقارب 14000 وشوي ،، لما رحت لمحل تغيير الزيت ،، سألته الزيت منتهي مررة ؟ قال الا زين ،، !!! يمديك تمشي عليه.. مع ان عداد الزيت وصل للون الاصفر ومشيت عليه بعد زيادة.
ماطول عليكم واهم شي تنتبهوا لهنقاط قبل ماتبدأوا في اي شي ،،
قبل كل شي سم بالله بعدين ابدأ..
***1- أهم شي تنتبه انك تعمل هالعملية وانت مطفي السيارة ، الكهرباء فقط تشتغل.
2- لا تغلط وتشبك مع مدخل ثاني غير رقم 7 ،عشان ماتخرب الكمبيتر حق السيارة.
3- لا تشبك لمدة طويلة.
4- في حال ما زبطت معاك اول مرة ،، عادي .. اطفي السيارة وعيد تشغيلها مثل ماشرحنا على وضع 2 للكهرباء فقط وعيد العملية. وانشاء الله تزبط معاك.
اذا فيه استفسار قبل ماتقوم بالعملية حاضرييييين ..
وللي يبي معلومات اكثر ،، الرابط موجود في توقيعي لكن باللغة الانجليزية.
طبعا في طرق اخرى ،، بس ماجربتها ،، اعتقد ان هذي اسهلها.
تحياتي ..
