معانتي مع ماركيز 2008

nasssser @user_254300 · 08-06-2011

السلام عليكم...

بصراحه ياشباب الله رزقني بماركيز والموتر مشالله حللو ومريح لكن بعد الشراء السياره ب 6 اشهر صار عندي مشكله بالمكيف يطلع الهوا فووق ينزل تحت رحت لكل الكهربائي اللي بالصناعيه قالي فيه عندك حلين

اول حل تشتري جهاز تكييف جديد

أو اسوي لك لي صغير عشان يطلع الهواء قداااام قلت اوكه صلحه انت المهم صلح المكيف وكل الازرار المكيف صارت قدااام يعني لو ابي الهواء يطلع فووق او ينزل تحت مراااح يطلع الا لقدااام على العمووووم هذي مو مشكله لكن المشكله بعد ماصلح المكيف واخذ 70 ريال وانا على سرعة 120 كم المهم والمكيف طافي اشوف الهواء يدخل من فتحات المكيف عرفت ان الهوايه ماتسكرت وهذا اللي انا مااحبه ...وخذ انواع الغبار اللي يدخل من الفتحات التكيف وريحة الديزل رجعت انا له وقال بسكر لك الفتحات بالسيم المهم قلت تصرف بس سكر الفتحات المهم جلس تحت الطبلون وجلس يلف بالسيم وخلص ومشيت انا جربت السياره نفس المشكله بس الهواء والريحه خفت من اول بس بفرق بسيييط وخصوصا لو جلست السياره يومين وشغلتها وشغلت المكيف يدخل التراب في عيني من جد شي يحير رجعت للعامل قالي هذا الحل اللي بيدي

تكفوووووووون ابي حل وربي كرهت الموتر :a120(115):

أمير الصراحة @user_136399 · 08-06-2011

أهلين أخوي
أولاً الله يكون في كونك
ثانياً مشكلتك يمكن تكون من موزع الهواء وسوتش المكيف
أنت إذا معك فلوس رح للوكالة الحاج حسين وراح يصلحونها لك بطريقة أنظف وبالعامية شغل نظيف
ولكن السعر مررررررررررة غالي تقريباً 1500 ريال بالكثير لأنه يبيله فك الطلبون كامل ومع قطع الغيار وشغل اليد ولكن لاتخاف
هم لما يفكونه راح يرجعونه زي ما كان تجربة شخصية في سيارتي بس مونفس مشكلتك وسيارة أخرى لزميل لي كان عنده نفس مشكلتك
ويبيلها يومين بالكثير يعني أقصى حد يومين إن شاء الله ولكن بمقارنة ما سوف تدفعه مقابل الإصلاح من ورشة لورشة راح يتعدى 1500
وأنت وأنا أخوك أشتر راحتك وراحت بالك ب1500 وخصوصاً في الكهرباء وأيضاء لا تنسى الصيف جاي يعني الوكالة أضمن لك وتعرف لسيارتك وخاصة معك ماركيز أفضل ما صنعوا الأمريكان فحافظ عليها من أيدي أصحاب التجارب على السيارات وترى الأمريكي ما يتحمل كثر الأيدي العابثة

وأما أنك تروح لمحلات الورش ولكن أنصح بذلك إلا إذا كنت تعرف مركز وليس ورشة وتكون بالفعل متخصصة بالفورد الميركوري والماركيز وشغلها تكييف لأنه كل شي إلا اللعب بالكهرباء لأنه الأمريكي إذا تم العبث في الكهرباء أعتبر السيارة أنتهت فالوكالة أضمن لك بعد الله سبحانه وتعالى ولو كان غالي ولكن ترتاح للمدى البعيد معليش أخوي ولكن أسأل مجرب كان معنا أمريكي وقصدي أمريكي يعني السيارة أمريكية والمواصفات سعودية وحتى لو المواصفات أمريكية
هي حساسة وما والأمريكي بالعامية إذا فتحت كبوته أنسى تسكره لذا فحافظ عليها وتوكل على الله ورح الوكالة وشف وش يقولون عنها ولاتخاف أبداً
شغلتك إن شاء الله بسيطة وأنت بس أدعوا ربك يسهلها ويفرجها وإن شاء الله ربي يعينك
وأي إستفسار أنا حاضر وأنا أخوك لا تردد في الأسئلة فنحن هنا لخدمتك وخدمة أعضاء الموقع والمنتدى كافة

وتقبل تحياتي ودمت:xyxwave:

XP2008 @user_95142 · 08-06-2011

هالمشكله تصير بالماركيز ، قد صارت لي بعد ما مشت السياره حدود 5000 و طلعت المشكله بسيطه لما وديتها للوكاله أكتشفو ان في مجرى الهوا دخلت أوراق و خبط السيستم لما شالوها تعدل المكيف .

و صارت في سيارتي السابقه 2002 بس بعد استخدامها 5 سنين القسام حق المكيف ضرب و رحت لورشه ترايستار ( متخصصه في المكيفات و عمالتهم فلبينيه ) و غيروه كلفني 600 ريال و ضبط المكيف .

أنا اشوف انك غلطت و ديت سيارتك عند الصناعيه لأن بعض الكهربائيه ما عندهم لا علم و لا تجربه بالموديلات الجديده فلو رحت للوكاله و فحصو المكيف و يعطونك رايهم كان أفضل ، و لو صلحت عندهم حتى لو كان فرق السعر أكثر افضل لانك راح تاخذ ضمان .

عل العموم يبدو إن قسام المكيف اللي عندك يحتاج تغيير و مدام موديل السياره جديد غيره و إرتاح .

بالتوفيق

al3meed 18 @user_206412 · 08-06-2011

انا اقول لك رح للوكاله بما ان موترك موديله جديد

omar_124 @user_241713 · 08-06-2011

من الآسآس المحل اللي رحت له فآشل ب التصليح ولعب عليك :)

اذا كآن قصدك ريش المكييف .. منديل ولا ورقه تحللك المشكله ولا تكلف شي :)