هل تعطلت سيارتك وصلحتها بنفسك أو بأقل الخساير (شاركنا بتجربتك )

salehhd · 2005-12-13T13:20:25+03:00

السلام عليكم ورحمة الله وبركاته رائيت هذا الموضوع في احد المنتديات وكان ذو فائدة كبيرة جداً فاحببت ان قوم بعمل موضوع مشابة في منتدانا الغالي وارجو الايغضب اخواني الفنيين مني:D الموضوع ببساطة هو ان يطرح احد الاعضاء مشكلة حصلت له في سيارتة الحالية او السابقة وكيف قام بحلها او صلاحها واعتقد اننا بهذه

akif alkurdi @user_169114 · 19-09-2009

البوري والتحكم بلسرعه والتحكم بالمسجل بسيارتي اللنكلون

قبل فتره توقفوا عندي واحد بعد الاخر وبعد عناء طويل مع الكهربائين ربنا جاب لي كهربائي يمني ابن حلال وفك الدركسيون وحاص فيه وحاول وفحص واخيرا طلب مني تغير الكمبيوتر الموصول بالشريحه اللي باخر الدركسون (اسمها حساس الايرباج)
رحت الوكاله واشتريته والحمد الله انحلت المشكله وكل شيء رجع طبيعي.
بس وين المشكله انه لما شرحت المشكله للبائع بالوكاله قال لي هذا ماله دخل بالبوري ولا بالتحكم بالسرعه.بس انا ما رديت عليه لانه الكهربائي وراني الاسلاك الكهربائيه المربوطه فيه مع الدركسون.

NKN 777 @user_183752 · 16-09-2009

موضوع جميل وشيق وجزاك الله خير اخوي على هالموضوع الرائع

انا كان عندي كابريس موديل 2001 واسمع طقه في السياره من الخلف جننتني

المهم رحت للميكانيكي وقالي المشكله عندك في المساعدات الخلفيه هي سبب الصوت

وغيرتها ومافيه فايده الصوت ماراح المهم بعد فتره اخذ اخوي السياره وسافر عليها

وكان وقتها فيه عاصفه رمليه وهو في الخط فتح الدريشه يبي يحذف علبة بيبسي معاه

وفجأه طارت القزازة الخلفيه المهم وصل للبيت بالسلامه ولله الحمد ورحت غيرت القزازة

والمفاجأه ان الصوت اختفى نهائيا طلعت المشكله بالقزازه الخلفيه!!!!!!

..........................................

ومشكله صارت لي مع سيارتي الحاليه من نوع لكزس

وقفت عند البنك ابي اسحب فلوس ولمى جيت اشغل السياره والا ماتدق ابد فتحت الكبوت

والا اصبع البطاريه طالع من مكانه شبكته من جديد وشغلت السياره والا الطبلون طافي

مافي نور ابد وديت السياره لكهربائي فحصها بالكمبيوتر قال كل شي سليم سيارتك

كهربتها 100% فحص الفيوزات كلها تمام طيب وش السالفه قال مافي الا افك الطبلون

ونشوف وش المشكله وقال مرني بعد ساعه انا رحت البيت وقال واحد من الشباب افصل

البطاريه وامش معاي بنوصل مشوار المهم فصلت البطاريه وبعد ساعه دقيت السياره

سلف والا الطبلون اشتغل وكل شي تمام.

بعيران @user_141089 · 14-09-2009

بسم الله الرحمن الرحيم
السلام عليكم ورحمة الله وبركاته

:wavey:اعادة برمجة السيارة بسرعه للكراون فيكتوريا والماركيز بشكل عام للفوردات:wavey:

لقد شدني هذا الموضوع وانا معجب صراحه بهذا المنتدى الرائع جدا واعتبره من افضل المنتديات لدي.......ماحب اطول عليكم بالكلام .........لكن ابي اشرح لكم قصتي مع الكراون فيكتوريا موديل 99 استخدام امريكي

...................
قصت حياتي ويا المشكلة
صارت معي المشكله في لمح البصر ...طلعت من البيت ابي اروح للبقاله على سيارتي الفورد وشغلتها ومشيت للبقاله واخذت الاغراض ولما رجعت للبيت وانا في الطريق كان عندي في السيارة مشغل الام بي ثري كنت شابكة في مركب الطفاية زي العادة وقمت واخرجت الام بي ثري
وفجأة اتفكك جهاز الام بي ثري داخل مشبك الطفاية واخرجت القطع المتناثرة من المركب حق الطفاية وبقي الفيوز حق الام بي ثري داخل المشبك حركته في اصبعي الا يخرج شرارة من المشبك والا انوار السيارة تنطفئ وتشتغل بسرعه مادري وش السالفه طلعت الفيوز الا هو محترق روحت البيت مافي شي السيارة شغاله....طفيتها ونزلت بعد عشر دقايق رجعت للسيارة شغالتها عيت تشتغل تسمع صوت دقتها الين ماطاحت البطاريه..قلت يمكن مافيها بنزين ولاكن مافي فايدة وسيت كل الطرق حتى اني فحصت علبت الفيوزات الموجودة تحت الدركسون ولقيت واحد فيوز محترق لونه اصفر وقوته 15 فولت....وجبت فيوز اصلي وغيرته.....مافي فايدة اخر شي لجأت الا نقل السيارة بالسطحه بقيمة 100 ريال لواحد كهربائي مصري:mad1:

وتدرون وش سوى بالسيارة ...سألني عن المشكلة وقصيت له قصت حياتي اللي قبل شوي
والله العظيم وهي في السطحه مانزلتها سو لها اعادة برمجة واشتغلت ...انا واقف عنده اتفرج وعلمني طريقت برمجتها وهي سهل ماتأخد دقيقيه

البرمجه وهي كالتالي::

:a1120(82):اذا كان ريموت الفكتوريا وكاله... تسوي

1_بسم الله الرحمن الرحيم:xyxthumbs:
2-تفتح السيارة
3- ركب المفتاح بمكانه
4-ادر المفتاح قبل وضعية التشغيل لما تشوف لمبات الطبلون اشتغلو اصبر شوي بتسمع صوت طن طن طن المعتاد لما تسمع الصوت حاول تسمعه 3 مرات
5- اطفئ السويتش واخرج المفتاح
6-انزل من السيارة وقفل الباب عن طريق الريموت كنترول
7-افتح باب السائق بالمفتاح وليس بالريموت
8- شغل السيارة وباذن الله كل شي يرجع لمكانه

:c0214:هذه البرمجه للسيارات اللي تضرب المطبات وتطفي ايضا واللي عيت تشتغل :c0214:

والله ولي التوفيق انشالله ماتواجهون المشاكل

عاشق كمري @user_182720 · 11-09-2009

:xyxwave:موضوع حلوو الله يعطيك العافيه
لان هذا الطرح يعطي الحلول ربما غير محتمله ولا تكلف شي و الي يقراء يمكن تكون صادفته مثل هذه الامور يطرحها ليستفيد الجميع

شكرا لك :xyxwave:

سر تكويني @user_182048 · 09-09-2009

الله يعطيكم العافيه على المواضيع الرائعه المطروحه لم فيها من فائده للجميع

ومشكله حدثت لي لاخي الاكبر منذ عامين كان مستورد فورد جراند ماركيز مواصفات خاصه
وكان القير بعد فتره مايعشق بعض النمر او انه يعلق على بعض النمررووداه تراي ستار وقالوله على طول >>> توضيب قير بحوالي 6000 ريال
وراح لورشه ثانيه قاله غير فلتر القير مع الزيت وزبط القير معاه ماكلفه 400 ريال

وسالفه لابن عمي اتى بجيب GXR من دولة الامارات المشكله عنده في الدبل الثقيل ااذا شغله يطلع ونه بالكرونه
ووداه ايضا لترايستار بفرع ثاني وشيكو عليه وقالوله توضيب قير، ولما طلع منهم صار الجير الاساسي يشكل بالتبديلات مو الدبل
ولد عمي ماصدق خبر وكلم اعز اخوياي الي هو زميله بالعمل وقاله قبل ماتجي تستلم جيب لي معاك بنزين بريالين قاله خويي سلامات ليه قاله ناوي اشب بالجيب من اولها قير
طبعا خويي ولله الحمد حرفه في المكنيكا ماقر لعب بسيارات اهل الحاره ويحب يستفسر كثير وسأله عن المشكله وقاله قال خويي اا صلحتها لك تعبي لي جيب الشاص فل قال ولد عمي ابشر مقارنه لتوضيب القير وش تسوي 40 ريال
المهم خويي نزل تحت ال GXR ولقا سلك القير مفصول اضاهر نسوه من بعد الفحص وهم يشيكون ونحلت المشكله القير الاساسي وترك مشكلة الدبل الثقيل
طبعا ولد عمي الله يسامحه جرد بخويي ولا عباله بنزين خخخخ>>> يمون

sanad911 @user_180530 · 07-09-2009

اولا أشكر القائمين على هذا الموضوع المفيد واخواني المشاركين

بصراحة ذكرتوني بأعطال السيارات وقلة فهم بعض الميكانيكية
ورجعتوني سنوات ورا علما اني صغير
اول سيارة تعلمت عليها وجلست عندي سنوات وبعدها من كثر اعطالها صرت اداوم بالورش وصارت لي مشاكل [COLOR=red]ارجوا انكم تستفيدون منها نوع السيارة 200 ال 88[/COLOR]
ايامها كان يازينها اما الحين اذا شفتها بالشارع اقول الحمد لله على العافيه ههههههه

المشكلة الاولى
المشكله ان السيارة ماصارت تمشي مثل اول حدها 120 الى 140 وبعدها تتفتف
واذا جيت ادعس النزين على الاخر وانا معشق الاول او الثاني وحتى الثالث تمشي وشوي وفجئة تكتم وساعات تطفى
رحت الورش قالوا توضيب كربريتر ووضبته ونفس المشكله رجعت له ثاني مره
قالي بواجي واسلاك بواجي وغيرتها ونفس المشكلة
بالاخير قالي غير الكربريتر لان شكله مافيه فايده
وصارت بيني وبينه مشكله لانه بصراحه خسرني كثير وله وجه يتفلسف
قلت يااخي قول من الاول مااعرف وريحنا ورجع لي مخاسيري
المهم تصافينا ويئست من الموتر وبعد شهور
وانا فاتح الكبوت واحوس >>>> يحب يحوس بالسيارة على غير سنع
والاقي جنب الكينه سلك يتدلى واشبكة في مكان توقعت انه مكانه
واجرب السياره واللاقيها من ابدع مايكون صافيه وتمشي
تدرووون وش هالسلك ؟؟؟
هذا البنزين الراجع ( الفائض) يعني لمى انت تدعس للسياره طرمبه البنزين تسحب كمية من التانكي الكاربيتور ياخذ الكميه اللي يحتاجها ويرجع الباقى للتانكي
فهذا السلك هو اللي يتحكم في البنزين ويرجع للتاني في حال صار عكل بها الوصلة ويزيد البنزين في الكربيتور ويسبب التفتفة

المشكلة الثانية
السيارة سوناتا 2004
المكيف عندي بارد وزي الحلاوة ولكن صارت مشكلة انه ساعات يفصل ومايشبك الا الين يذبحني الحر والجو حار واذا شبك ماشاء الله البروده ممتازة
المهم رحت من كهربائي الى كهربائي طبعا عجبني اكثر من واحد قالي بصراحه مااعرف غريبه المشكلة
ورحت لواحد قالي المشكله عندك الكمبريسر تعبان ويبغاله تغيير انا عندي مستعمل وبركبه لك مع تنظيف المواصير ب 1200
قلت له انا متأكد مافيه شي وبصراحه ماعجبني لانه ماتعب نفسه حسيته يبي يصرف الكمبريسر اللي عنده بأي طريقة
وجلست اسبوع والمشكلة زي ماهي
بالاخير مريت على كهربائي بكستاني وقلت له المشكله قالي افتح الكبوت وخله شغال
وفجئه فصل وماشبك قعد يحوس الرجال
وشال فيوز المكيف طبعا فيوز كبير مربع وركب فيوز الهرن ( البوري) مكانه
يعني بدل الفيوزات وضبط المكيف

قلت كم حسابك قال ولا شي
عطيته 50 وبوسه على الراس ههههههههههههههه

وآسف للإطاله

يحبي للورش @user_98749 · 05-09-2009

السلام عليكم
اي مشكلة تسير لك خلك رايك وبتصلحه ببلاش احسن من يلعب عليك يعني (هدي هدي)
كان عندي مكس يوم من الايام الحراره h ياولد انا وسوست على طول الورشه كل ورشه تالف من عندها الي يقول غير مراوح والي يقول طرمبة موية والي يقول تسيخ رديتر والي يقول غير رديتر في النهايه قلت خلني اغير غطاء الرديتر واغيره ب 10 ريال وزي اللوز ولله الحمد
2 مره غيرت زيت القير المهم طلعت من عندهم كلش تمام معايره وطلع تمام بعد 5 ساعات تقريبن القير صار ثقيل ولا يغير يطول في الثاني يولد منى منى اناقلت شكلها توضيب وش ا العين السياره جديده حتى مو ماشيه شي وديتها لفلبيني شيك عليه يقول قير تعبان ....منى منى ويقول فك الكبوت شاف الزيت ناقص رحت غيرته عند الوكال وضبطو الزيت بالملي والسياره تمام ولله الحمد...(هدي هدي)

دحيم الجوفي @user_180715 · 04-09-2009

<

<span style="font-size:18px"><span style="color:red">S.p.e.e.d

صديق لي سيارته شيفروليه سوبربان 2005
يشتكي من صوت طقطقه بالأسفل جهة السائق قريبه جدا من عجلة القيادة
الصوت يظهر خاصة على الأرض غير المستويه
على الخط لا يظهر الصوت
يظهر الصوت فقط على الأرض غير المستويه و المطبات

ماهي المشكله و الحل

و شكرا

السلام عليكم

هالحالة مرت علي في اليوكون وطلعت عيوني ، وفي الأخير تبين أن السالفة

العمود اللي يطلع من الدركسون ويشبك في الدودة به فضاوة ، ومن يوم غيرته

انتهى الوضع كله ، كلفني عند الجميح حوالي 450 القطعة مع التركيب

هاوي موتر @user_22764 · 03-09-2009

يااااااهلا ومرحبا بالاعضاء كلهم لبى قلوبكم

اول شي بقولكم مشكلتي مع السوسوالـ2004
طبعا كلكم تعرفون شوارعنا الزينه والي كأنها مسطره<<ايه هين:bigggrin:
المهم كنت دايم امغط السوسو 2004 والجديده مريحها عالاخر<<الاخ يعاني من ادمان سوناتا
المهم وكل يوم ماغير اكل في هالحفر والمطبات والجبال
وصار يطلع صوت مع طلوع المطب ونزوله ومع عيون القطط

المهم الصوت زاد ولا عاد يحتمل
المهم رحت شيكت عند ميزان المجد الي بالصناعيه القديمه قالو لي لازم تغير المساعدات
وطبعا على طول قالو شغل اليد بــ300 <<غير قيمه المساعدات

المهم تركتهم وكلمت الوالد الله يحفظه وطرحت له المشكله قال تعال بس واتركهم عنك
المهم جيت وطلعت انا والوالد لصناعيه العاصمه ورحنا عند واحد يعرفه ابوي وشيك على الموتر وقال جلد المقص خربانه قلت طيب واذا ماطلع منها قال لاتعطيني ولا ريال وانا الي راح اشتري الجلد

المهم قلت يلله توكلنا على الله وغير الجلد ومخرطه ومادجري وش
ويوم خلص والله ياشباب احس ان السياره قمممممممممممه في الهدوء مع المطبات

_______________________________________________________________

تحيااااتي

سالم الدراز @user_180449 · 03-09-2009

انا اخوكم من ليبيا وجدت الاطلاع على تجارب الاخرين في اعطال السيارات امر مفيد لكني لم افهم كثير من المفردات المكتوبة بتجارب الاخوة الافاضل لانها بلغة عامية غير مفهومة لدينا حيث اننا نستعمل مفردات ايطالية في قطع غيار السيارت وبذلك افضل ان ان يكون سرد المشكلة اللغة العربية الفصحى ومفردات انجليزية ليسهل على الكل فهم فحوى الموضوع ولك كل الشكر والتقدير

اخوكم سالم الدراز

مخاوي الظلام @user_169903 · 22-08-2009

مساء الحبايب بشعبان
يبلغهم ربي رمضان
تام بلا نقصان ...
و يجزيهم اعلى الجنان

2004 سبورت @user_174948 · 17-08-2009

يعطيكم العافيه ياشباب
انا صارتلي قصه وهي انه طلع عندي تفتفه في الفورد شي خفيف يعني تقدر تقول تكتيم المهم رحت الوكاله قالولي كويلات بذيك القيمه ((صراحه كنت مطفر ولا كان غيرتها وصلحت بو بندر انا ووجهي )) لكن رحت لسوداني منتف في الصناعيه قالي ياأبني رح لصاحب الشكامين فك الرصاص الي في الدبات وفكيت والحمد لله كل شي رجع احسن من الاول لا وزاد عزم السياره بعد وشكراااااااااا
(((اقم صلاتك ما يجيك الى العافيه )))

مروان80 @user_174618 · 10-08-2009

مشكور اخي العزيز مشكور

MAX637 @user_172909 · 10-08-2009

R

Rayed20

نفس مشكلتك أخوي انا ترتفع الحرارة معاي اول اذا تعديت 160 .....مع مرور الوقت صارت اذا تعديت 120 ترتفع على طول...غيرت الراديتر وكالة وغيرت البلف وغيرت الطرمبة والمراوح سليمة يعني ماتركت شيء ماسويته .....

طلع بالأخير رأس المكينة يبغى له خرط وتغيير وجه وكلفتني الشغلة 900 ريال...

أتوقع أن مشكلتك هي ((بداية)) تبويس رأس المكينة ومع مرور الوقت راح تلاحظ ان الحرارة ترتفع مع السرعات القليلة لين يبوش مرة وحدة يصير ماينفع لو تمشي 10 ...

هذا اللي صار معي ...وموفق خير

ماادري وش اقولك اخوي بس الله يعين اذا راس المكينه هو السبب

وجزاك الله خير

معاذ عبدالله با @user_173777 · 06-08-2009

مشكلة حصلت لي في اللومينا:
مرة كنت انا واخواني (اثنين) كنا مسافرين على الموتر
وكان اخوي العود متكي ورا وشابك جهاز كمبيوتر كفي على الشاحن حق الولاعة المخصصة للراكب الخلفي...
المهم الا شوي ويشوف لمبة الشاحن طافية...
امممممممممم
يا ربيه
وش المشكلة؟؟
جا اخوي الثاني وقال:
هذي اللومينا كلها مشاكل كهربائية!!!
المهم
جاء اخوي العود وقال عطني كتيب التعليمات حق السيارة
وطالع فيه
وقال وقف على جنب وانزل
وركب مكاني
وفك حاجة تحت الدركسون..وبدل فيوز بفيوز احتياطي
وشبك الشاحن واشتغل...
طلعت المسألة بس فيوز احترق وبدله بواحد احتياطي يجي مع السيارة
__________________

Rayed20 @user_146705 · 06-08-2009

M

MAX637

بسم الله الرحمن الرحيم

السلام عليكم ورحمه الله وبركاته

انا معي مكسيما 2001 وانا مهدي يعني سرعتي 120 وتحت الحراره ولا احلى منها بس

المشكله اذا اسرعت يعين اذا وصلت 170 وفوق ترتفع توصل النص وكل ماسرع زياده ترتفع اكثر لدردجه انها وصلت حلو H المهم رحت غير الرديتر وغلطتي يوم اشتري تجاري بي 150 ونفس الكلام ترتفع خليتها سنه تقريبا ثم شريت اصلي 900 ريال على ايش 900 مااردي المشكله مديلها 2001 وغيرت بلوف الحراره وهم اثنين وفعلا خفت الحراره عن اول يعني ترتفع بس مو على طول يعني اذا صرت امشي 200 في الظهر وطولت عليها ترتفع فاماادري وش المشكله الصراحه هل كل المكسيمات كذا ولا انا عندي مشكله مع ان كل شي مغير بلوف حراره اثنين ورديتر والمراوح شغاله مافيها شي وطرمبة الماء مافيها شي وسالت واحد من اخوياي معه 2004 قال انا موتر طبيعي مو مثلك فاللي عنده خبره يفيدني

نفس مشكلتك أخوي انا ترتفع الحرارة معاي اول اذا تعديت 160 .....مع مرور الوقت صارت اذا تعديت 120 ترتفع على طول...غيرت الراديتر وكالة وغيرت البلف وغيرت الطرمبة والمراوح سليمة يعني ماتركت شيء ماسويته .....

طلع بالأخير رأس المكينة يبغى له خرط وتغيير وجه وكلفتني الشغلة 900 ريال...

أتوقع أن مشكلتك هي ((بداية)) تبويس رأس المكينة ومع مرور الوقت راح تلاحظ ان الحرارة ترتفع مع السرعات القليلة لين يبوش مرة وحدة يصير ماينفع لو تمشي 10 ....

هذا اللي صار معي ...وموفق خير

MAX637 @user_172909 · 06-08-2009

بسم الله الرحمن الرحيم

السلام عليكم ورحمه الله وبركاته

انا معي مكسيما 2001 وانا مهدي يعني سرعتي 120 وتحت الحراره ولا احلى منها بس

المشكله اذا اسرعت يعين اذا وصلت 170 وفوق ترتفع توصل النص وكل ماسرع زياده ترتفع اكثر لدردجه انها وصلت حلو H المهم رحت غير الرديتر وغلطتي يوم اشتري تجاري بي 150 ونفس الكلام ترتفع خليتها سنه تقريبا ثم شريت اصلي 900 ريال على ايش 900 مااردي المشكله مديلها 2001 وغيرت بلوف الحراره وهم اثنين وفعلا خفت الحراره عن اول يعني ترتفع بس مو على طول يعني اذا صرت امشي 200 في الظهر وطولت عليها ترتفع فاماادري وش المشكله الصراحه هل كل المكسيمات كذا ولا انا عندي مشكله مع ان كل شي مغير بلوف حراره اثنين ورديتر والمراوح شغاله مافيها شي وطرمبة الماء مافيها شي وسالت واحد من اخوياي معه 2004 قال انا موتر طبيعي مو مثلك فاللي عنده خبره يفيدني

rafa @user_148895 · 05-08-2009

فحص السيارة بالكمبيوتر

[CENTER]بعض الذين قاموا بزيارتنا بالورشة كانوا يسالون عن(ألضؤ الأصفر الذي يظهر أمام السائق في واجهة عدادات المقرأة) .
هو رمز لخطاء حدث في إحدى أنظمة السيارة .
نبداء بتعريف مختصر عن هذا الرمز.
جميع السيارات الحديثة أصبح بها ألان جهاز كمبيوتر يقوم بتنظيم أداء عمل المحرك على حسب طبيعة الوضع الذي يعمل بيه سواء في سرعة بطيئة أو سريعة أو صعود المرتفعات أو في العوامل المناخية البارد أو الساخن وحتى في نسبة احتراق البنزين والحفاظ على حماية البيئة، وذلك عن طريق أجهزة استشعار (حساسات) تقيس وترسل إشارات إلى الكمبيوتر وبدوره يقوم بتحليل هذه الإشارات ثم يحولها إلى تعليمات إلى الأنظمة العاملة في أداء حركة المحرك ليعمل على أفضل وضع ممكن.
كذلك يلتقط الأخطاء التي تحدث في تشغيل السيارة (الأجزاء المسئول عنها وهي الأجهزة الكهربائية والالكترونية والبخاخات والحساسات) ويخزنها في ذاكرته ثم يرسلها لسائق السيارة في شكل رمز ضؤ أصفر بواجهة قرأه العدادات.
تجد مكان هذا الكمبيوتر في جهة كرسي الراكب ألإمامي ، أما على يمين قدميه في سيارات الدايوو على سبيل المثال أو تحت درج المحفوظات مثل ماهوا في المازدة .
طريقة معرفة مافي ذاكرة الكمبيوتر من أخطاء تحتاج لجهاز خاص وهو scanner وشكله في حجم آلة اليد الحاسبة.
تقوم بتثبيته في فيشه الكمبيوتر لتحصل على المعلومات التي بداخله.
بعض هذه الأجهزة يمكن توصيلها بالحاسب الشخصي أو الكمبيوتر المنزلي لعرض تقارير عن حالة سيارتك.
(ولنا حديث أخر في ذلك حسب الحاجة ).
أترككم وأنا أسألكم عن ماذا تحب أن ترى في مدونتي في مجال السيارات ؟
سوف نركز بالدرجة الأولى على طلب الأغلبية لما يحبون معرفته عن السيارات .

[/CENTER]
http://autoplus-rafa.blogspot.com/ منقول عن مدونة (سيارة+) .

مليكلو @user_172215 · 04-08-2009

السلام عليكم ..موضوع جميل ..مشكلتي في المكيف حق السيارة ..اعبي فريون وبعد ثلاث شهور يخلص ..يا ترى ايش الحل شباب..

نوع السيارة كرسيدا 83

abama00 @user_171928 Registered User · 01-08-2009

بيض الله وجهك