باجيرو & باترول //

أخوي أتلانتس.. كيف الحال يا خوي..

أقول أخوي.. مافي داعي كلام ماله لزوم.. يعني عبارة اللي ما يطول العنب... صارت جديمه واليوم قمنا نركب بورشات يعني الله يخلي النيسان لأهله.. ولله الحمد..

الحين أخوي.. إنت ليش محتر ؟

خلنا نتفاهم شوي شوي...

الباجيرو اللي تقول عنه ما يقوم مع الفتك.. هذا 3.5 و 3.0 عزيزي..

إذا ما تعرف إتفرق بينهم فالشكل فما لومك لأن الفرق فقط في الرنجات من الخارج...

الباجيرو 3.8 قبل 2007 ما يوصل لقوة الفتك ولكن 2007 و 2008 قوه وعزم أكبر تتفوق عن الفتك..

وليش الشباب تستهوي النيسان ؟

أنا بقولك

لأن النيسان فتك والكروزر لهم سامان بالهبل بعكس الباجيرو وأنا لو هاوي بر وتحديات إندود كنت خذت لي باترول مع إني أفضل الكروزر والباجيرو ومع ذلك الباجيرو 3.8 يمشي ولا يهول في البر..


ومواصفات الباجيرو الجديد بالنسبه للمكينه والجير وأنظمة توزيع العزم و و و و.. ترى تعبنا من تكرارها... شوفلك موقع للباجيرو وإقرأ عنه، الثقافه شي جميل

أرجع وأكرر الفتك له رزته وهيبته ما حد ينكرها ولكن اللي يعرف للباجيرو مايفك بيفهم كلامي...


تقبلوا حبي وتقديري

أقول كيف حالكم يالربع ومبارك عليكم الشهر ولو إنها متأخره

الحين..

أول شي سعر السيارتين محسوم فالباترول أغلى بحوالي 40,000 إذا ما أخذنا بعين الإعتبار المواصفات نفسها في الثنتين من فتحه، زنون، جلد، 6 سيديهات إلخ

الحين المكينه.. اللي يقول شو هالمقارنه ما تسوى بين 4.8 و 3.8 أقوله هذا كلام هواة مع إحترامي له وللجميع

الحين يا إخوان بالذمه وإنتوا الحكم

هذا فتك 4.8 يطلع 286 حصان
وهذا مايفك وحطوا خطين تحت مايفك ويطلع 269 حصان

يعني مستاهله 1000 سي سي على كم حصان ؟

بتقولولي الفتك أقوى في الرمل وحق اللعب في الطعوس ماله مثيل بقولكم والنعم وما حد قال العكس

ولكن حبايبي ما حد منكم طلع بالـ 3.8 وظرب فيه إندود و جرب

عزم المايفك على 3.8 مو العزم اللي يستهان فيه بالعكس يناطح الكروزر الثمانيه

بالإضافه: لا تقارنوا مكينة الفتك الجديمه بمكينة المايفك الجديده، شفتوا فرق الأرقام وفرق السعه و 20 حصان أو أقل أعتقد إتسكت الـ 4.8

وعلى طاري العزم، جير 1 2 3 الباجيرو يروح عن الباترول واللي بيقول كاني ماني بقوله دورلك إثنين شد بلد وشوف بعينك

الفورويل: الإثنين فيهم دف لوك خلفي ووسطي وأنظمة الأمان في الهيكل والسواقه لصالح الباجيرو ويكفيك نظام التعليق المستقل

المتسوبيشي حطت كل ما تملك من تطور تكنولوجي وصلتله في الإيفو 9 في الباجيرو

نظام تحويل العزم من الأمام إلى الخلف و العكس حسب الحاجه وكذلك نظام تحويل العزم من اليسار إلى اليمين والعكس

يا إخوان الباترول له رزته وهيبته وكذلك كانت له أيامه، والباجيرو الجديد ما هو بالسهل لا تغركم الموديلات القديمه منه ترى الجديد فرق 360 درجه

أنا مو متحيز للباجيرو لأني من ملاكه ولكن أنصح لوجه الله

باترول 4.8 أو باجيرو 3.0 بقول باترول

باترول 4.8 أو باجيرو 3.8 بقول باجيرو

هذا إذا كان الأخ السائل يسأل بغرض إقتناء سياره عائليه أما لو كان أعزب وما له بأمور التلغيم وما يحتاج سياره طويله أقترح عليه 3.8 قصير

أما إذا كان هاوي تلغيم فأقول إبعد عن الباجيرو وخذ فتك 4.8 لأن الباجيرو من الصعب تلغيمه..

ودمتم