ظاهرة غريبة في الجمس بدبل

اشكر الجميع على التعليق والمعلومات المفيدة وارجو ملاحظة بعض الامور
اولا المتتبع للمواقع لا يجد السوبر بان صالون في التطعيس الا النادر واظن ان احدا لا ينكر ذلك خاصة في المواقع العربية والاجنبية في الغالبحسب علمي البسيط وهذا لا يعني انه لا توجد مقاطع وانما قليلة جدا مفارنة بالسيارت الاخرى
ثانيا الظاهر من كلام الاخوة ان السوبر بان يعتمد على السائق اعتمادا كبيرا بخلاف غالب سيارت الجيوب الامريكية واليابانية فهي تعتمد على نفسها اعتمادا كبيرا ولذلك يسوقها الغشيم في الغالب ولا يغرز الا اذا كان يقصد تغريزها او كان لايعرف فيها شيئا نهائيا
ثالثا السوبر بان كما يقول احد الاخوة خفيف وزنه 2000 كيلو فطق وانا اتعجب من خفة وزنه لو كان صحيحا بهذا الوزن لانه يكون اخف من الاند وغيرها
ارجو التعليق والمزيد؟؟؟؟!!!!!!

مشكور اخوي ابراهيم
ما قصرت على الشرح الوافي وباخذ اللي بدون دبل والله يكتب ما فيه الخير

السلام عليكم ورحمة الله وبركاته...
اخوي tea tainالنسبة للتاهوغير دبل صادق اذا غرز غرز لانه ثقيل ومافيه دبل يرفعة ويعاون الموتر لكن هو يمشي صح لكن يحتاج ان الهوا ينسم الى اقل من 15 ويكون السواق طااااااااره لان المواتر هذي مايصلح لها غشيم ((بدون دبل))ابدا لان االاعتماد الاساسي ع السواق وكذا لاتوقف الا بنزله قويه عشان ما يغرز حاول انك تجتنب المطانيج لان المطانيج اذا كان الموتر غير دبل مايصلح الا ان تدوووس واذا دست تعور الموتر اما الدبل تعال بالهون ولا عليك بس عموما استخر واذا منت مستعجل بشرى الموتر وانت راعي بر او اقلها راعي كشتات ولو خفيفه اقول اصبر جمع كم قرش وزيد وخذ دبل عشان ماتتحسف بعدين وتكره الموتر مع اول تغريزه...
وبالتوفيق........

هلا اخوي ..
قسم الترخيص يمشي حسب كلام اوراق الجمارك

انا معاك بهالكلام ..

لكن بالكتلوج مو مبين معاي نسخة الامارات ..
.
.
عندي كتالوج التاهو Z71
قزة المحرك 5300 و 355 حصان وقوة جر اقصاها 3720 كيلو جرام ..
و كتالوج
اليوكون الدينالي بمجرك 6200 و 441 حصان عند 6000 دورة بالدقيقة و قوة قدرة على الجر اقصاها
3583 كيلو جرام ..
.
.
الهايلكس الي عندنا موديل 2007 وزنه 1600 كيلو جرام ل السنجل(2WD) مثل النيسان التيما بعد ..

عموما انا شاكر لك المداخله الطيبه والاهتمام

السلام عليكم
ياجماعه عندنا جمس صالون مديل 86 دبل قير اوتو حجم مكينته 300 ولكن اداءه في البر متواضع وماهو ذاك الزود ولكن ارتفاعه ممتاز جدا
ايضا السائق له دور كبير لاني اذكر احد الشباب كان يطاعس على كابرس مديل 92 ويسايف افضل من الى معه هاي لوكس او ددسن

طيب يا خوي وامـ في كالتوج السوبربان الـ1500 حمولة السيارة القصوى 845 كيلو+10 ركاب
ليش عندك بس 540 و لو هي 2000كان ما عاد احد نافس الجمس في البر ولا في المطارحات
الوزن فيه غلط
و ترا الهايلكس عندي وزنها 1850 كيلو فارغه
وزن السوبربان صدقني ما ينزل عن 3000 ابدا ابدا

ومزبوط سيارتك صنع و تجميع امريكي(لان رقم الشاص بدايته 1)

والله يا اخوي بالعكس انا اشوف انها منتشره وبكثره مثل ما ذكر الاخ مهند

يستخدمونها شركات السفاري في دبي مثل ما يستخدمون طبعا اللاند

طيب سؤالي يا اخوان
عن التاهو بدون دبل هل تمشي الحال في الرمال يعني في نساح لان اولادي يحبون الرمل واللعب فيه
وانا تخوفت لما سمعت عن غرازها الشين
وانها اذا غرزت غرزت
ولا اقدر اخذ اللي بدبل لان ما اقدر ازيد بالفلوس
معجبتني التاهو مرة بس متخوف من هالموضوع فابي رايكم

جبتلكم دليل قاطع على صحة كلامي ..
.
.
تفضلوا


و
شورايكم ..؟

وزن الجمس اولا 2000 كيلو جرام مثل اللاند كرورز بالضبط واذا اي الشخص حب اني اصورله ملكية السيارة انا جاهز ..
.
.
الجمس يمشي ومايرده شي ..

يحتاج شيئيين باعتقادي .. انه يكون مرفوع اكثر من الطبيعي لانه نازل من الامام او ينحط له دعامية صب + السائق يكون دريول ويعرف للتطعيس مب اي واحد ..

أخوي إبراهيم الناصر كفووو والله
ولاتداري إبن أخيك ولد وايل ترى عبداللطيف جميل مراضيه وقد عزمه في فندق الهوليدي إن عشان ياخذ إنطباعاته عن FJ كروزر اللي الظاهر صار له حادث وسلم ماشاء الله ..
طبعا إن كان على خبري في مكشات:smilie6:

المهم ياولد وايل تراني أمزح معك لاتعصب علي وتخنقني :smilie6:

وأقول أنا معي تويوتا ومعي شفر وطاعست بالكامري في الثمامة وطاعست بالتريل بليزر في الدهنا..
والموتر حرارته ماعدت النص
اللهم لك الحمد ،،،
طبعا أمشي مع الدروب اللي معقولة لأني رجل تعديت مرحلة مراقى الطعوس العالية وإستعراض العضلات ، يعني أبغى الدروب اللي توصلني لربعي ،،،

ولكن الدعوى على السواق ومدى معرفته بالدروب والسيوف والجروف وإلا الغشيم يغرز بالأسفلت ..اخخخخخخخخخ
والأمريكي لو تجي عليه علامة نيسان أو تايوتا بدون تغيير قالوا هذا مضبوط وقالوا بعثراته كلها ، بس المشكلة الأحكام لابد أن تكون قاسية على الأمريكي مخافة منافسة طرازات الياباني مثل الضجة اللي صايره على تويوتا التندرا ومنافسته للأمريكي من صنفه

والحق ماينزعل منه
وتقبلوا تحياتي :)

استخدمة جمس وانيت 92 و97 حوض قصير بدون دبل سيارة قوية ومريحة بالرمال اكثر من

الازفلت وشي معروف انه بالبر لازم تنسم الكفرات حتى اصحاب الجيوب مضطرين للشي هذا

تتميز بالصلابة حتى وان كانت محملة ابرز الاماكن الي رحتها محمية عروق بني معارض

حاليا معي 2004 دبل ازرار حوض قصير ممتازة جدا وتعتمد عليها شركة ارامكو كثير

خصوصا بالاماكن الصحراوية وطبعا كل الوانيتات اللي اشتريتها اخذتها مزاد عند خروجها من الخدمة

من ارامكو وكذلك مع دينالي 2006 لكن اعتقد ان الحوض تعليقه قاسي ويتحمل اكثر وحاليا اتمنى

احصل z71 بس للاسف مالقيت الا استخدام امريكي


تحياتي للجميع

السلام عليكم ورحمة الله وبركاته.....
المشكله ان الواحد يتكلم ويذم ويمدح وهو ماجرب :a120(89):
عموما انا ما ودي ندخل في نقاش حاد بس انا معي موتري تاهو 2007 وجربته ماشاء الله يكفي ويوفي ولا ابي اهايط واكثروقول واكثر بس هذا الواقع انا جالد الموتر بطعوس الشرقية وهي اصعب من الرياض وماحولها واتمنا ان لا يخالف احد في هذه النقطة الا المجرب لان رمل الرياض وماحولها يميل للون الاحمر المعروف بتماسك ومايتباعد اما الشرقيه رملها ابيض اقشر وللي ماشاف ولاجرب لايخالف يسال
وغير كذا الموتر انا كاشت فيه مرتين لدهنا صح الدهنا طعوس قشرا بس الموتر والله ابدع ولا قال لا كان معنا ربع تيوتا وفكسار وممشانا واحد وبالمراقا التاهو يطلع اول بحكم قوه مكينتة
وبالنسبه لابن العم ولد وايل الظاهر انت اكلت علقه بالامريكي مرةاوكرهته عقبها
بالنسبه للخرارة اكثر من مره رحتلها ولاواجهت صعوبات ابدا وما اتوقع ان الخراره مقياس للمواتر لان الخراره مغير هلكسات ودداسن يمشون سلام سلام <<<<مع احترامي للهلكسات والدداسن,,
والاخ الخ الوفي كلامك عن التعليق صحيح لكن ليس سيىء ابدا ولكن الاند احسن
وبالنسبه ان الموتر يتفكك من داخل والحراره ترتفع ...
التفكك ماله علاقه بالقوة هنا ومع ذالك اقول لك ان الموتر ما يتفكك الاشوي يعني التفك الطبيعي جدا اللي يحصل بكل السيارات...
والحرارة انا اتوقع ان الاخ مجرب جمس 88 :smilie6:
انا عندي التاهو الحراره ثابته ولا تزيد لا بالخط ولا بالديره ولا بالطعوس


واولا واخيرا السيف بضاربه لابنصلة يعني السواق هو المهم مش السيارة
وشكرا للجميع....

فية ناس وللاسف مايعتبرون الجموس شى وخاصة اهل السيارات اليابانية بالنسبة لي معي يوكن99
شقيت فية عروق الدهنا ولم اوجة مشاكل وين اللي يقول اتحداة يدخل العروق ومن تجربتي
لvxr حق ولد عمي لقيت اليوكن افضل واخف قيادة من ال vxr وولد عمي ساق اليوكن
لقاة اخف من الvxr وكلامي اوجة للكل من يشكك في اليوكن

اشكر الجميع على المعلومات القيمة
لكن المقطع كان على السيارة الحوض وليس فيه تطعيس
واذا كان الاخوة يقولون ان السبب وزن السيارة الثقيل اظن ان الماكينة الكبيرة قد تعوض الوزن الثقيل خاصة ان الاند وزنه 2700 تقريبا والجوس اكثر من 3000
ارجو المساعدة

يالله انبسط يابو خليل

وانا من ظمن قائمه ابو خليل انتظر وبشغف تجربه العملاق سييرا

عطنا تجربتك هنع وانطباعك بشكل عام وياليت لو فيع شوية تفاصيل[/CENTER]

مضبوط يا شيخ وجربت السوبربان (موديل قديم 85 قير عادي ودبل عصا- دفرنسين) والموديلات الحديثة 2005 ونازل كذلك بدفرنسين وكل هالنقاط موجودة فيه

لكن الحق يقال موديل 85 بيض الوجه في المناطق الجبليه والشعبان وقت الأمطار لأنه مرتفع جداً ولا ينطفء بسهوله حتى والسيول مغطيه جميع الكفرات كاملة.

الله يوفقك والجميع

سلام